காசா போரில் பொதுமக்கள் கொல்லப்பட்டது குறித்து இஸ்ரேல் ராணுவத்தினரின் சாட்சியங்களைப் பதிவு செய்துள்ள ‘நாஸா’ ஆவணப் படம் அமெரிக்காவில் வெளியாகியுள்ளது. இஸ்ரேலுக்கு அமெரிக்கா வழங்கும் ராணுவ உதவி குறித்த விவாதத்தை இப்படம் மீண்டும் தீவிரப்படுத்தும் என எதிர்பார்க்கப்படுகிறது.
டெல் அவிவ் நகரின் மொட்டை மாடிகளில், இரவு நேரத்தில் சிலர் பேசுகின்றனர். அவர்களின் முகங்களும் குரல்களும் மறைக்கப்பட்டுள்ளன. சிலர் காகிதத்தில் வரைந்து விளக்குகின்றனர். அவர்கள் விவரிப்பது, காசாவில் தாக்குதலுக்கான இலக்குகள் எவ்வாறு தேர்வு செய்யப்பட்டன என்பதைப் பற்றித்தான். யுவால் ஆபிரகாம், ரேச்சல் சோர் இயக்கியுள்ள இப்படத்தில், சந்தேகத்துக்குரிய ஆயுதக் குழுவினரைக் கண்டறிய செயற்கை நுண்ணறிவு கருவிகள் பயன்படுத்தப்பட்டதாகக் கூறப்படுகிறது. பொதுமக்கள் அதிகளவில் உயிரிழப்பார்கள் என்பது தெரிந்தும் தாக்குதல்கள் நடத்தப்பட்டதாக பேட்டி அளித்தவர்கள் குற்றம்சாட்டுகின்றனர். உணவு விநியோக மையத்துக்குச் சென்றவர்களைக் குறிவைத்ததாக ஒருவர் கூறுகிறார்.தொலைவிலிருந்து நடத்தப்பட்ட தாக்குதல்களை, காணொலி விளையாட்டுடன் மற்றொருவர் ஒப்பிடுகிறார். பழிவாங்கப்படும் அச்சத்தால் இவர்கள் அடையாளத்தை மறைத்ததாகவும், தகவல்கள் சரிபார்க்கப்பட்டதாகவும் இயக்குநர்கள் தெரிவிக்கின்றனர். இந்தக் குற்றச்சாட்டுகளை இஸ்ரேல் ராணுவம் திட்டவட்டமாக மறுத்துள்ளது. பொதுமக்கள் பாதிப்பைக் குறைக்க முயற்சிப்பதாகவும், செயற்கை நுண்ணறிவு பயன்படுத்தப்பட்டாலும் தாக்குதல் முடிவுகளை அதிகாரிகளே எடுப்பதாகவும் விளக்கம் அளித்துள்ளது.
வெனிஸ் திரைப்பட விழாவில் இப்படத்துக்கு 25 நிமிடங்கள் எழுந்து நின்று பாராட்டுத் தெரிவிக்கப்பட்டது. ஆனால், இஸ்ரேலில் கடும் எதிர்ப்பு எழுந்துள்ளது. பிரதமர் பெஞ்சமின் நெதன்யாகு, இப்படத்தை யூதர்களுக்கு எதிரானது என விமர்சித்துள்ளார். இயக்குநர்களின் குடியுரிமையைப் பறிப்பதாக அமைச்சர் ஒருவர் எச்சரித்துள்ளார்.
நியூயார்க் திரையிடலின்போது, ஹமாஸின் 2023 அக்டோபர் 7 தாக்குதலை நினைவூட்டும் படங்களுடன் போராட்டக்காரர்கள் திரண்டனர். அந்தத் தாக்குதலைக் கண்டித்த ஆபிரகாம், காசா பொதுமக்கள் கொல்லப்படுவதை அது நியாயப்படுத்தாது, என்றார்.
இயக்குநர்களுக்கு ஆதரவாக 2,000-க்கும் மேற்பட்டோர் மனுவில் கையெழுத்திட்டுள்ளனர். பத்திரிகையாளர்கள் பாதுகாப்புக் குழுவும், சர்வதேச ஆவணப்பட சங்கமும் அவர்களுக்கு விடுக்கப்பட்ட மிரட்டல்களைக் கண்டித்துள்ளன. சொந்த நாட்டுக்குத் திரும்ப முடியுமா என்ற அச்சம் தனக்கு இருப்பதாக ஆபிரகாம் தெரிவித்துள்ளார்.
அமெரிக்க நாடாளுமன்றத் தேர்தலும், இஸ்ரேல் தேர்தலும் நெருங்கும் நிலையில், படத்தின் வெளியீடு அரசியல் கவனத்தையும் ஈர்த்துள்ளது. போரின் முதல் இரண்டு ஆண்டுகளில் இஸ்ரேலுக்கு அமெரிக்கா வழங்கிய ராணுவ உதவி குறித்த கேள்விகளையும் இயக்குநர்கள் முன்வைக்கின்றனர். அக்டோபர் 9 முதல் மேலும் பல அமெரிக்க நகரங்களில் படம் வெளியாகிறது. நவம்பர் இறுதியில் ‘தி கார்டியன்’ இணையதளத்தில் இலவசமாகப் பார்க்கலாம். “இந்தத் தாக்குதல்களில் அமெரிக்க மக்களின் வரிப்பணமும் பயன்படுத்தப்பட்டுள்ளது” என்கிறார் ஆபிரகாம். படத்தின் மூலம் அந்தப் பங்கையும் வெளிச்சத்துக்குக் கொண்டுவர விரும்புகின்றனர் இயக்குநர்கள்.
